中環出更：張國鈞當橫額嘜頭 惹轉區疑雲
未來兩年將分別舉行區議會及立法會選舉，各黨派已開始密密落區插旗，務求爭取曝光。近日就有人發現中西區區議員張國鈞（Horace）在屯門友愛邨及安定邨一帶掛上宣傳橫額，呼籲市民加入民建聯為專業界發聲。咁啱盛傳屯門區議員陳雲生有意退休，莫非Horace想空降屯門接替陳雲生個議席？抑或佢想選立法會法律界功能界別呢？
自稱「唔會輕易轉區」
身為律師嘅Horace話，由於該黨想吸引更多年輕人及專業人士加入，所以就用佢嘅嘜頭製作一系列宣傳橫額周街掛，仲話有中區街坊在區內見到橫額，更加打電話問佢係咪唔選西環區轉去選中環，搞到佢哭笑不得。Horace重申自己在區內工作多年，同唔少街坊已經非常熟落，唔會輕易轉區。至於會唔會走競逐立法會法律界議席，佢就話暫時未有咁嘅打算喎。
雖然Horace無意做屯門區議員，但陳雲生想退休就係事實。陳雲生話，自己已經做咗二十幾年區議員，係時候要退休享受人生，依家物色緊繼任人選，但暫時仲未搵到。陳雲生向來敢言，特別係嚴打貪官及醜聞議員絕不手軟，要搵接班人真係唔容易。
卓妮