建制派一時漏招，令泛民主派議員成功突襲取得立法會工務及人事編制兩個小組委員會嘅控制權，搞到班建制派要申請逾期加入委員會補鑊，直到依家泛民任主席嘅兩個小組仍然就申請議而不決。就喺呢個時候，早前被褫奪全國政協委員資格嘅自由黨田北俊（田少）突然退出工務小組，此舉令建制派喺小組內更加勢孤力弱外，亦可能助長泛民操控撥款，睇嚟田少呢個「壞孩子」已同建制愈行愈遠。
田少前日去信工務小組主席梁家傑，指政府同泛民嘅對立日益嚴峻，政府態度強硬、拒絕協商溝通，泛民亦發起不合作運動，令「拉布」由大會蔓延至財務委員會及轄下兩個小組委員會，議會運作幾乎癱瘓。佢仲話，面對眼前呢個僵局，佢既無力化解，亦不願再糾纏其中喇，所以決定即日退出工務小組喎。
另一邊廂，建制派就繼續爭取申請逾期加入兩個小組委員會，但泛民一朝得勢當然玩到盡，兩個小組開埋特別會議都未有決定，仲話要「加場」討論，建制派已表明會杯葛特別會議。而申請咗後補加入人事編制小組嘅議員謝偉銓就不滿已經提出咗申請五個星期，但該小組主席梁繼昌仲無聲無氣，所以去信要求梁盡快決定，以免阻礙未來工作安排。