立法會上個會期審議新界東北發展計劃前期撥款期間受到示威者衝擊，一度佔領立法會地下大堂，設施嚴重損毀，立法會期後聘請顧問公司檢討保安問題。立法會行政管理委員會尋日開咗三小時會議討論有關顧問報告，聞說建築署都有派員出席，仲建議立法會倣效政府總部加設三米高圍欄。學聯成員罷課期間已成功爬過政總圍欄，佔領東翼前地，觸發提早佔中，證明圍欄根本作用不大。
有行管會委員透露，顧問公司建議立法會面對示威區嘅玻璃門加設捲閘，同埋喺示威區設置一批一點二米高、五十公斤重嘅鐵馬。而建築署就建議立法會好似政總咁，於近政總東翼前地嘅停車場出口，及立法會餐廳近添馬公園位置加設三米高圍欄。
會上有委員質疑，咁矮嘅鐵馬連細路仔都擒到過去，加嚟都笑死人；亦有委員認為政總加設圍欄都被人批評違反「門常開」精神，立法會冇理由仲跟風。有委員甚至仲建議倣效外國議會，開會時方圓一公里範圍內都唔准示威添。不過，討論完一大輪，最後都係冇共識，要等秘書處諮詢全體議員意見先至再作決定。