政情：李漢奸 民主阿婆無人理
被指為「搞事四人幫」成員嘅「李漢奸」民主黨創黨主席李柱銘及「民主阿婆」前政務司司長陳方安生，向來鍾意就香港事務指指點點，又到外國「唱衰」香港兼乞求干預，但隨着兩人嘅政治能量已微乎其微，屢遭外國冷待；而在近期佔領行動，兩人更加無人理會。港大最新民調就係最好證明，今次兩人齊齊跌出十大市民最熟悉嘅政治人物，兩粒「舊電池」已經被人遺忘，連回收都慳番！
佔領行動持續五十多日，港大民意研究計劃於上月三十一日至本月五日，透過真實訪員以隨機抽樣方式，成功以電話訪問一千零八名市民，被訪者在無提示下講出最多十名最熟悉嘅政治人物，結果發現最多被訪者提及嘅首三名政治人物，依次為特首梁振英、政務司司長林鄭月娥及社民連梁國雄，而早前被「搣柴」褫奪全國政協委員資格嘅自由黨田北俊，則重新打入十大排名第八。不過，熟悉度同支持度並非掛鈎。
政治能量微 「摺埋」好過
調查結果有升自然有跌，李漢奸同民主阿婆呢兩名過氣政治人物雙雙跌出十大排名，事實上，李漢奸同民主阿婆嘅泛民光環隕歿有迹可尋，舉例指二人於今年七月訪問英國「唱衰」香港，疑碰到一面灰遭到英方冷待，李柱銘結束訪英行程返港即呻到樹葉都落，「大呻」英方為經貿利益不願得罪中國，因此未能與較高級的官員會面。
及至最近佔領行動持續多時，李漢奸同民主阿婆都角色欠奉，前者無乜建議被佔領人士採納，後者絕少喺佔領區出現，最多只係加把口「抽水」。依家調查顯示二人喺市民熟悉度大跌，反映二人嘅影響力已經近乎零，如果佢哋有自知自明都係自動「摺埋」好過。
受查近三年 貪曾亦插水
值得一提嘅係，「貪曾」前特首曾蔭權爵士喺今次調查排名亦直線下跌，由上次排名第四下跌至第九，驟眼睇好似畀市民逐漸遺忘，但最唔應該遺忘佢嘅係廉政公署，事關貪曾貪盡海陸空、歎盡省港澳嘅醜聞已被廉署調查將近三年，真係乜都查到水落石出啦，係咪應該盡快向市民交代呢？