政情：中環出更：湊大「太子」鄧鉅明感觸
流汗播種者，必歡呼收割。太子珠寶鐘錶前日喺灣仔會展舉行三十周年晚宴，數以千計政商界名人齊去見證開心時刻，主席鄧鉅明（Jimmy）及太太鄧宣宏雁成晚滿場飛，喜悅之情掛滿臉上。Jimmy話，回首過去三十年，公司由尖沙咀樓梯底嘅鐘錶行開始，一步一腳印取得今日嘅成就，殊不容易。展望未來，鄧太話，希望下一步可以打響自家珠寶品牌，做到鐘錶與珠寶業務並駕齊驅。
Jimmy感慨話，佢覺得非常欣慰係鄧家第二梯隊已經形成，包括佢嘅兩名兒子亦軒及亦棋，仲有姪仔及外甥都返公司幫手，佢哋能力好強，彼此關係好好。
施如來神掌 育第二梯隊
Jimmy不失幽默本色話，等佢施展如來神掌，將啲真功夫過晒畀第二梯隊，咁就掂喇！
中華總商會永遠榮譽會長霍震寰都有到場，佢笑笑口話，最近咁啱有幾個組織慶祝成立三十周年，認真唔容易。問佢屋企最近有冇喜事？佢爆料話大家姐霍麗萍啱啱添咗個孫女。咁幾時輪到佢飲新抱茶呢？霍震寰好搞笑話：「係喎！點解都冇乜消息？」睇嚟阿仔霍啟文要加把勁喇。
當晚現身嘅政商名人仲有「玩具大王」蔡志明夫婦、莎莎國際主席郭少明夫婦及鐘錶界人士等，多不勝數。是夜節目內容雅俗共賞，包括大提琴家李垂誼及男高音莫華倫難得一彈一唱，眾人聽得如癡如醉，賓主盡歡。
卓妮