問吓大家，乜嘢情況仲衰過「福無重至，禍不單行」呢？冇錯嘞，之唔係禍事接二連三，甚至排山倒海囉。唔係講笑呀，世紀瘟疫伊波拉陰霾未散，登革熱、禽流感、腸病毒又殺到埋身，都咪話唔得人驚，萬一數疫同時爆發咯喎，香港唔死都一身潺喇。
嗱，屋漏偏逢連夜雨，佔領鬧劇陰魂不散夠煩喇，病毒亦步亦趨先至攞命。由十月底至今，本港已經確診三宗本地登革熱個案，感染源頭亦由首兩宗西營盤地盤，擴展至青衣社區，顯見蚊患遍及全城，連食衞局局長高永文都擔心，登革熱好可能落地生根變成本港風土病，問你怕未。
咁仲唔止，內地又多兩宗H7N9禽流感確診個案，一宗喺新疆，一宗喺江蘇，前者已經死亡。大家都知，中港只係一河之隔，每日有數十萬旅客來往兩地，只要一人染病，隨時全城淪陷，○三年沙士就係前車之鑑喇。再講吖，本港係候鳥南下過冬嘅路線之一，加上每天都有大量內地活雞供港，病毒喺本港大爆發嘅風險簡直高唱入雲。
聽吓市民點講啦。「東方報業民意調查」顯示，對於香港接二連三登革熱確診個案，三成八受訪者批評防蚊及滅蚊力度不足；兩成七擔心成為風土病；兩成五憂慮香港疫情擴大。至於冬季係流感及禽流感高峰期，四成八人擔心醫療負荷百上加斤；兩成四恐逼爆病房及急症室；兩成一憂慮疫症隨時大爆發。
嗱嗱嗱，市民唔係杞人憂天。港府出名後知後覺，話就話會喺各口岸執行防疫措施，同埋跨部門合作滅蚊，其實得個講字嘅咋。事實擺在眼前，所謂加強口岸防疫，不過係要求旅客出現不適時主動聯絡口岸職員咁大把，你話有幾大作用吖！至於滅蚊咯喎，青衣居民投訴蚊患愈來愈嚴重，根本唔多覺食環署滅蚊。正如立法會議員話齋，港府防疫意識鬆懈，公營醫院人手又緊絀，萬一疫症爆發，後果不堪設想。
真係講得冇錯，好似伊波拉咁吖，至今仍未受控，全世界都嚴陣以待，淨係港府懶懶閒，係咁意叫非洲旅客填張健康問卷就算數，同唱空城計有乜分別呀。更大鑊嘅係，最近有多宗腸病毒喺院舍爆發，加上佔領鬧劇沒完沒了，當局將成擔精神心機擺喺政治議題上面，幾乎無人關心瘟疫臨門，你話死唔死吖！
正如大部分受訪市民話齋，當局防疫唔嗲唔吊，漏洞百出，加上政治問題未解決，隨時失守都有之。正所謂禍福無門，惟人自招，港府仲唔打醒十二分精神，香港隨時有滅頂之災嘅咋。