民主黨（白鴿黨）將於下月換屆，重新選出正、副主席等職位。由於往後兩年將舉行區議會及立法會兩場重要選舉，加上臨近政改投票，預計現任黨主席劉慧卿將會連任穩定軍心。雖然副主席羅健熙如無意外都會連任，但另一位副主席蔡耀昌就表明會祼退白鴿黨黨務，加上立法會議員單仲偕（騸雞）無意競逐副主席，睇怕會掀起一場副主席爭奪戰。
騸雞前年本來一度係主席大熱人選，但最終以十六票輸畀卿姐，如果佢唔選主席改選副主席，相信幾乎做硬咁滯。不過，我哋問過騸雞，佢話今屆無意競逐黨內任何職位，會將權力逐步下放畀後生仔。唔單止咁，外間亦傳佢連立法會都唔選，莫非想好似李華明咁全裸退搵真銀？
既然蔡耀昌同騸雞決定唔選副主席，咁該黨就要再物色過另一位副主席。據聞黨內認為九龍西議員黃碧雲同葵青區議員尹兆堅有能力問鼎副主席一職，但黃碧雲話自己想繼續專注立法會事務，而尹兆堅就坦言近日有人不斷游說佢出選副主席，但佢仍然考慮緊，下星期前會決定係咪報名參加喎。