政情：日圓跌旅業旺禤國全笑晒

最近日圓跌至創七年新低，唔少人都打算趁聖誕節到日本玩個夠。早前有日傍晚約六點鐘，我哋見到東瀛遊執行董事禤國全現身中環歷山大廈一間餐廳飲嘢，一邊飲一邊講電話。原來佢要去樓上開會，因為未夠鐘，所以再打吓躉囉！講起日圓跌，禤國全即刻笑晒口，話生意確實好咗。佢仲話，今年聖誕及新年市道會再好啲，事關來年農曆新年喺二月份，同聖誕節時間拉得開啲，好多人有機會出遊兩次，確實對生意有正面影響喎。