政情：溫暖牌「百家被」送老友記
今時今日做義工除咗要有愛心，仲要有幾招絕技傍身。近日天氣轉涼，中電總裁潘偉賢（Paul Sir）就聯同企業發展總裁莊偉茵、社會福利署署長葉文娟、立法會議員梁志祥及一班弱能和精神病康復學員，齊齊用碎花布合力縫拼「百家被」，送畀四百名參加活動嘅「老友記」，為佢哋冬天添溫暖。
潘偉賢盼助人精神延續
咪以為男士做針黹就會「姐手姐腳」，原來手藝絕對不比女士遜色。Paul Sir除咗做針黹了得外，尋日仲憶起做義工時嘅難忘片段。佢話二十年前踏足馬鞍山時，當地有一個礦場，礦場結束營運後，唔少礦工仍留喺山上聚居，當地就好似一個被遺忘嘅孤島。佢哋一班員工其後喺該區進行駁電工程時見居民生活環境惡劣，電力設備破舊，擔心容易釀成火災，於是自發免費為居民重鋪電線，仲合資購買電器送上門。佢希望呢份助人熱情和精神能延續下去。