政情：龍獅節冇申撥要撲水
今年初審計署踢爆盛事基金帳目混亂，並指有份申請撥款嘅元旦龍獅節活動喺創造就業人數方面「報大數」，又被踢爆擅自將剩餘撥款退還予贊助商，變相令政府蒙受損失，結果搞出個大頭佛。龍獅節籌委會召集人陳鑑林（橄欖）諗住明年元旦再添食，但就至今仍未向盛事基金申請撥款，據聞寧願將活動規模縮水，並四出「撲水」搵贊助商捐錢補番條數，莫非見過鬼怕黑？
盛事基金收緊申撥準則
經過年初審計署及立法會政府帳目委員會連番發炮後，橄欖搞龍獅節都未有好似以前咁高調，只係低調於官方網頁宣布，會繼續喺明年元旦舉行。不過，據有份搞龍獅節嘅人透露，來年龍獅節規模會比以往細得多，以前有電視直播，又話創咩世界紀錄咁，但今年只係預計喺尖沙咀搞個嘉年華就算數。不過，細搞還細搞，使費仍要大約一百萬元，所以籌委會仍然頭痛緊，要周圍撲水搵贊助。
另一邊廂，有傳聞話盛事基金怕再搞出大頭佛，所以收緊申請撥款準則，等一眾質素未達標嘅活動申請可以自動「收檔」。盛事基金評審委員會主席林健鋒（Jeffrey）話，現階段當然唔能夠透露有咩項目申請緊基金，但所有申請審核仍然進行中，唔會因為審計署同帳委會炮轟後就停止接收申請。佢仲話，下月評審委員會開會，預計新一輪嘅遴選結果好快出爐。
陳投資有道 賣舖賺千萬
不過，就算無盛事基金揼水，龍獅節有橄欖做籌委會召集人，都唔怕莫財啦！從政多年嘅橄欖一向投資有道，早年仲被發現賣舖位都勁賺過千萬元，相信一個龍獅節使費，絕對難唔到佢嘅。有政界中人話，以橄欖嘅財力，佢一人攞一百幾十萬元出來，都只係濕濕碎，邊使勞師動眾去撲水吖。我哋曾經多次聯絡橄欖，諗住問清楚來年龍獅節嘅活動詳情，但始終未能聯絡上。