中環出更：唔驚伊波拉 蔡菜子照遊非
今個秋冬，除咗預防流感同登革熱，好多人亦關注伊波拉病毒擴散情況。日前佛學動力文化藝術基金會於維園舉辦「香港曬佛節」，都係以對抗伊波拉疫情為主題。不過，主禮嘉賓之一嘅立法會前議員、現任東區區議員蔡素玉（蔡菜子）就一啲都唔擔心，仲啱啱帶家人去完非洲納米比亞等地返港添！
蔡菜子話，佢計劃前往非洲時並未爆發伊波拉，後來知道伊波拉起源於西非，遠離佢哋去嘅中非同東非，所以就決定起行。佢話根據去年觀賞動物大遷徙嘅經驗，知道當地陸路交通唔方便，所以佢哋一行六人自己組團，包車周圍去。為以防萬一，佢哋事前亦買咗保險，一旦目的地成為疫區而令行程縮短或取消，都可以獲得賠償。
初嘗羚羊野豬
今次佢哋除咗睇野生動物外，仲遊覽咗維多利亞瀑布、紅沙漠及石化森林等。蔡菜子話，喺當地見到唔少參天巨木，但原來全部都係化石嚟，令佢印象深刻。佢哋又食咗當地人狩獵所得嘅羚羊同野豬，仲話係咁大個人第一次食喎！
卓妮