中環出更：友情「耀」正生 勵志片籌款
為協助大嶼山基督教正生書院籌款改善校舍，匯聚資訊科技界（IT）及會計界專才嘅「資訊財務師協會」就諗出拍戲呢招。而該會嘅創會會長蘇耀經（Sammy），近日號召政商界名人幫手開戲，除咗獲立法會前資訊科技界議員譚偉豪借出豪宅作拍攝場地外，更獲工業總會前主席鍾志平及中華出入口商會會長莊成鑫等人「科水」支持。
本身係微電影發燒友嘅Sammy，暑假曾經到訪正生書院，睇見破落校舍，大為感觸，於是夥拍總幹事呂志豪拍番齣戲。
IT人發起 獲商界科水
為慳錢，Sammy擔起監製兼出品人角色，並狂碌「人情卡」，台前幕後搵來逾百人參演，當中不乏獲獎無數嘅資深電影人。不過，眾人為慈善，由策劃、導演以至演員，都只收「友情價」。
好似譚偉豪就借出豪宅一日作為拍攝場地，點知由朝拍到深夜十一點鐘都仲未收工，差啲令佢無家可歸。而Autodesk台灣、香港暨
澳門總經理李煥明就擔任音樂總監，為齣戲創作兩首主題曲。至於互聯網專業協會會長洪為民就搵來合和實業董事總經理胡文新，免費借出場地搞首映，認真唔話得。
今次齣戲嘅題材屬勵志電影，講述唔同環境成長嘅男女主角，因為各自做錯人生抉擇，差啲賠上前途，但經歷挫折後重新出發。唔少名人睇過試片後都話有意義，已準備「包場」請朋友睇戲，順便做善事。
卓妮