尊師重道係中國人嘅傳統美德，可惜時移世易，今時今日對年輕人講呢一套，可能係對牛彈琴嘅咋。呢，睇吓依家嘅大學畢業禮，簡直淪為學生做政治騷博出位嘅舞台，怪招百出，笑話多多，尊師就冇喇，辱師就有份。
話口未完又嚟喇。浸會大學尋日舉行畢業禮，又有學生搞事，有人喺奏國歌時撐起黃遮，有人領畢業證書時帶埋黃遮上台，好似大義凜然咁，令人嘆為觀止。好在校長堅守原則，怒斥學生不尊重畢業禮，拒絕即場頒發證書。又難怪校長扯火嘅，大學畢業典體係莊嚴嘅儀式，對於絕大部分學生嚟講，一生只有一次，咁都要搞破壞，咁都要扯上政治，佛都有火喇！
正所謂，要人哋尊重你，首先要尊重自己。學生連最基本嘅禮貌同尊重都唔識，佢哋究竟點樣讀書o架？近年類似事件已經唔係第一次，而係一再發生，都係時候畀啲教訓佢哋咯。講真，對於呢啲故意搞破壞嘅學生，莫講話唔頒畢業證書，直接趕出場都仲得，反正佢哋咁鍾意擔遮，唔該去街頭擔個夠，唔好影響其他學生及家長。
真係諗極都唔明，讀到大學畢業，大大話話讀咗廿年書啦，點解連基本嘅做人道理都唔識？唔通老師冇教學生要尊重別人？講起老師，真係唔講猶自可，一講把幾火。古人話老師係負責「傳道授業解惑」，依家啲老師啱啱相反，有教法律嘅副教授唔止自己知法犯法，而且教唆學生違法，甚至連幼稚園教師都向幼童灌輸「警察係壞人」嘅思想，問你服未。正所謂，臭罌出臭草，劣師出劣徒，唔怪得學生愈來愈偏激喇，佢哋衝擊當閒事，違法當食生菜，畢業禮上搞搞震咯喎，佢哋可能認為係濕濕碎嘅咋。
咁都未算吖，校園內有不務正業嘅老師，校園外有歪理連篇嘅政客。嗱，法庭對佔領行動頒布禁制令，來自法律界嘅立法會議員居然鼓吹有法不依，話咩「唔守法唔代表唔尊重法治」喎。你話嘞，老師知法犯法，政客有法不依，而政府又唔敢執法，年輕人喺咁嘅環境下成長，有乜法子唔是非不分，黑白顛倒吖。
古人話齋，少年智則國智，少年強則國強。有啲學生愈來愈反智，愈來愈偏激，香港未來旨意佢哋，又點會有運行吖。