政情：民主動力 變爛攤子
由多個泛民黨派及團體組成嘅民主動力成立超過十年，係泛民溝通平台，更曾提交意見書、統籌大型遊行、甚至擔當選舉協調角色。不過，隨着泛民嘅政治光譜愈來愈闊，民主動力至今已淪為協調選舉機器，苟延殘喘。近日佢哋改選，竟然由民主黨（白鴿黨）東區區議員趙家賢接替鄭宇碩出任召集人，在選舉協調工作上有利益衝突之嫌，所以最後都係要由鄭宇碩繼續處理選區協調工作，真係得啖笑。
怕捲入角色衝突
民主動力月初進行改選，出任召集人多年嘅鄭宇碩終於退下火線，由「乳鴿」趙家賢出任新召集人。由於趙家賢既係白鴿黨區議員，為咗唔想令人覺得該黨想透過民主動力操控選舉，於是決定改由現時只擔任副召集人嘅鄭宇碩繼續處理選區協調工作，之後再交番畀趙家賢處理選舉部署同宣傳工作，以免有角色衝突之嫌。不過，區選四年先舉行一次，如果連協調選舉工作都做唔到，真係唔知仲有咩做嘞。
泛民恩怨難化解
趙家賢就話，希望民主動力以後唔止負責區選協調咁簡單，話日後會大搞選民登記活動同地區論壇，令政黨新人有更多論政機會喎。
本身係調解員嘅趙家賢仲話，希望可以化解泛民黨派之間嘅恩怨添。不過，白鴿黨同新民主同盟就區選搶區一事積埋咁多牙齒印，加上白鴿黨自一○年支持政改一役後，已經被社民連及人民力量等激進派狙擊，睇怕都無乜可能可以化解到喇，分分鐘仲要鄭宇碩掉轉頭幫佢調解恩怨都未定。
雖然民主動力依家淪為協調選舉機器，但都曾經風光一時。當年泛民因為唔想前特首董建華連任而成立「反董連任大聯盟」，但隨住董成功連任，聯盟成員於是在○二年六月成立民主動力，繼續推動民主政制發展，更一度成為泛民共主。不過，自從○四年立法會選舉後，泛民在立法會內成立「飯盒會」，之後又先後成立咗終極普選聯盟及真普選聯盟，令民主動力逐步被邊緣化。