中環出更：盧文端 施子清 為選戰表態
沙田馬場尋日舉行盃賽，唔少政商界名人入場輕鬆吓，咁啱中華廠商聯合會（廠商會）會長施榮懷（Irons）父親施子清及廠商會副會長吳永嘉（Jimmy）外父盧文端兩位福建幫頭領都前後腳入場。外界盛傳Irons及Jimmy都有興趣競逐下屆廠商會立法會議席，卓妮趁機問兩位老人家意見，施子清語氣堅定話，唔贊成Irons做議員。至於盧文端就首次鬆口話：「做議員可以考慮嘅。」兩位老人家首次表態，唔知係咪私底下傾過偈呢？
盧文端話，邊個代表廠商會躋身立法會仍言之尚早，依家仍未知邊個會出線，佢話：「可能施榮懷想出呢？」傳聞幾年前有某政策局想搵Jimmy做副局長，但遭盧文端反對，尋日盧就不諱言依家做官好難，成日被人鬧，做議員就可以考慮，起碼冇咁困身喎！咁又係，議員仲可以鬧官添！盧文端聽罷哈哈大笑。
無耐盧文端的結拜兄弟施子清現身，施子清一聽到Irons可能有意參選立法會議員，即皺眉表態唔贊成，因為做議員個個都被人鬧，而且做議員對佢哋家庭唔係咁適合喎！施子清仲話，Irons仍未同佢提過件事。不過，亦可能傳聞並非真確，所以Irons無提起都未定。
蒙德揚獲贈南華波衫
講番尋日信興集團贊助嘅樂聲盃賽，信興副主席蒙德揚（David）廣邀好友齊聚。南華足球隊班主張廣勇特意送上一件波衫畀David，以感謝佢贊助南華多年。大家都知David鍾意跑步，好少踢波，咁件波衫幾時至大派用場？David笑稱，第日南華唔夠人踢，佢咪可以着住落場囉！
卓妮