係人都知，外語能力係一個國際都會嘅先決條件。可惜吖，香港人嘅英語水平每況愈下，家陣連好多內地城市都不如，你話係咪羞家吖。香港一沉百沉，一衰百衰，國際大都會呢塊金漆招牌，睇怕好快就拆得嘞。
呢，有機構調查發現，香港在職成年人英語水平，喺六十三個國家同地區中只能排三十一位，比舊年急跌九位，輸畀排十三位嘅老對手新加坡九條街唔在講，更加首次被北京、上海同天津爬頭。不可不知，今次已經係香港連續第七次評分下跌，再咁落去，遲早淪為包尾大幡都似。
唔係靠嚇o架，考評局早前公布全港性系統評估報告，學生中英文水平慘不忍睹，有中三學生連「busy」（忙碌）咁簡單嘅單詞都讀錯，有小三學生更加將「放棄」寫成「放氣」。點解搞成咁？師資水平低下係其中一大原因，教資會最近公布八大院校應屆畢業生統一英語水平評核成績，考得最差嘅居然係教院。你話嘞，為人師表自己都唔掂，教出嚟嘅學生又好得去邊吖。
唔怪得香港競爭力每況愈下喇，教育搞成咁，競爭力唔跌至奇喇。以前內地尖子對香港嘅大學趨之若鶩，家陣風水輪流轉，之前有個遼寧狀元不惜放棄港大獎學金，寧願去北大深造。可以見到，內地名牌大學愈來愈受到港生追捧，早排七十幾間內地院校嚟香港招生，吸引大批應屆文憑試考生同家長捧場，北大、清華等名校更加係爭崩頭添。
即係咁，愈來愈多家長同學生對本地教育失去信心，除咗教育質素出問題，更加係因為校園愈來愈政治化。呢，有大學教授不務正業，一味鼓勵學生違法佔領，搞到唔少年輕人無心向學，沉迷政治，又點會讀得好書吖。
話時話，佔領運動搞咗個幾月，部分學生一直冇返學，有人遲交功課，有人缺席中期考試，有人甚至學分唔夠要延遲畢業添。年輕人有書唔讀走去瞓街，唔通以為做街頭鬥士就有前途？
正所謂，種瓜得瓜，種豆得豆，只要睇吓年輕人嘅成長及學習環境，就知道點解有人愈來愈激進。喺學校，通識科要反政府，至可以攞高分；喺議會，要識掟嘢爆粗至可以出位。再加上反中亂港傳媒唯恐天下不亂，日日煽風點火，年輕人耳濡目染咯喎，想唔激進都幾難。
計功夫茶話齋，年輕人如果真係唔鍾意讀書，除咗瞓街之外，仲可以學吓捉魚。點解？香港繼續沉淪落去，遲早變番小漁村，到時有一技傍身就冇有怕啦，係咪！