立法會內務委員會尋日討論任命邊啲議員加入調查高鐵香港段工程延誤嘅專責委員會（專委會），聲言要發起不合作運動嘅泛民主派竟然同建制派夾好晒，打算雙方各自提名番早前已加入有關籌委會嘅十三位議員加入專委會就算數，反映所謂嘅不合作運動根本係名存實亡。點知議員梁國雄（長毛）就睇唔過眼，中途話要加入專委會，大家於是焗住投票選舉委員，但就講明夾好，長毛又點會加入到吖！
泛民方面，胡志偉、莫乃光、范國威、李卓人同毛孟靜獲提名加入專委會，連埋建制派就啱啱十三人。點知長毛中途話要加入，仲寸爆泛民：「唔係拉布咩？咁我改為拉票啦。」議員黃毓民亦批評泛民︰「又話不合作運動，正一垃圾會！」 最後專委會正、副主席亦一如所料由籌委會主席廖長江及副主席謝偉銓擔任。胡志偉就死撐話由籌委會成員加入專委會係「傳統」，又話畀廖長江做主席係「夾咗好過唔夾」，起碼信得過喎。
另外，早前工務小組委員會開會處理建制派議員逾期加入小組申請時，議員鍾樹根就話主席有酌情權畀議員逾期加入。法律顧問尋日就澄清主席係冇酌情權嘅，睇嚟建制派都係要透過財務委員會投票硬闖喇。