政情：撐反爭拗查自己 監警會自拆招牌

仍否公道惹關注

監警會兩位委員，包括會計界立法會議員梁繼昌及大律師馬恩國，早前先後因為撐佔領同反佔領嘅立場，以及佩戴或展示有象徵意味嘅黃、藍顏色絲帶惹起爭議，亦都有意見指另一名委員、立法會議員黃碧雲支持佔領行動，令人關注監警會可唔可以保持公道。

此外，相關委員亦就處理有關佔領行動投訴個案時應否避席嘅問題爭拗，監警會主席郭琳廣後來就將有關佔領行動嘅投訴交由嚴重投訴個案委員會跟進，令部分委員如梁繼昌等變相避席，但馬恩國及黃碧雲仍屬於嚴重投訴個案委員會委員，有份處理佔領行動中市民投訴警方嘅個案。

收萬多份「意見」

結果監警會就收到約一萬三千份來函「表達意見」，部分批評個別委員嘅立場。雖然呢啲來函大部分係格式一樣嘅電郵，但始終數量龐大，監警會包括主席同三位副主席在內嘅十八名委員，尋日就召開咗兩個半小時嘅特別會議，討論委員點樣披露利害關係，同點處理呢啲來函。郭琳廣會後話，監警會將研究成立一個獨立委員會專責處理呢啲來函，甚至邀請「外人」，包括監警會前主席同副主席加入。

監警會一直標榜「獨立」，點知依家或要搵「外援」在內部成立多個獨立委員會，聽落都幾諷刺。據了解，早於去年嘅林慧思事件，監警會都收過一啲涉及秘書處高級人員及委員嘅投訴，當時已在內部成立過一個委員會，並在今年五月建議監警會，應要考慮成立處理涉及監警會委員及秘書處人員嘅專責處理投訴委員會，有鑑於近日再收到大量投訴，故尋日先再次討論。其實係咪只要表明立場嘅委員避席就已可解決呢？