中環出更：怪醫自薦 做政改民調補裂縫
佔領行動搞到社會撕裂，早前連醫學會內部都爆爭拗，為咗係咪就佔領行動及政改問題做業界民調，搞到會長史泰祖同前會長蔡堅反面，兩人早前接受訪問以至落到佔領區為會刊影相，都係面左左，似乎好難收科。不過，醫學界立法會議員梁家騮（怪醫）尋日就拍心口，話會自行向業界做政改民調，莫非佢想做「和事老」？但唔驚兩面不討好咩？
形象唔會令人感偏頗
醫學界早前已就政改聯署一事產生分歧，一班年輕醫生聯署爭取真普選，但另一班資深醫生就反聯署，希望佔領人士盡快撤離。怪醫前晚就約咗發起年輕醫生聯署約二十幾人見面，佢話會向醫學界選民進行調查，調查詳細內容未定，希望業界就政改問題表達意見。
其實怪醫出手都唔出奇，一來佢嘅立場向來予人感覺泛民唔係泛民、建制唔係建制，至少唔會令人感覺偏頗；二來佢做咗兩屆議員，都表明唔多想連任，寧願留番啲時間湊仔女同埋搵真銀，相信由佢出手擺平今次事件都有好處。
卓妮