中環出更：「一」番好意 良言贈青年
蜚聲國際的愛滋病權威何大一（David）日前訪港，除接受城市大學頒授榮譽理學博士學位外，更抽空出席香港專業及資深行政人員協會（專資會）交流晚宴，見吓班本地精英。David現身，老中青「粉絲」聞風而至，爭住影相「集郵」。何大一在晚宴上鼓勵香港青年人要「做人生該做的事」，而唔係「做能做的事」。
見慣大場面嘅David有求必應，與一眾專資會成員影足全晚外，上台分享成功竅門時，更係有問必答，唯一唔想講嘅就係佔中話題，而台下嘉賓都錫住佢，無強人所難。風趣幽默嘅David快人快語，大方分享成功方程式，佢話想成為傑出科學家，必須做事有熱誠、夠投入、有策略、執行力強，再加上善於解決問題嘅能力，咁就無往而不利。
「做人生該做的事」
David又話，佢經常教學生精益求精，唔準交「爛」論文、做「爛」實驗。若要人生攀上高峰，David就話，要「做人生該做的事」，而唔係「做能做的事」。呢番話，引來台下熱烈掌聲。
當晚交流宴之所以搞得成，原來全靠港大校務委員會主席梁智鴻（金刀梁）穿針引線。金刀梁話，同David一直在內地推行愛滋病防治工作，並肩十幾年，走遍河南、安徽及雲南，情如兄弟，晚宴上開心到攬頭攬頸。智行基金會董事盧毓琳都有現身，佢話「智行」收養咗一萬七千名愛滋病遺孤，免費供佢哋由小學讀到大學，所以同David行善目標一致，好啱傾喎。
卓妮