政情：謝凌潔貞帶病致詞後快閃
教育局局長吳克儉同教育局常任秘書長謝凌潔貞傳不和，呢個係官場嘅公開秘密。近日更傳出有人要求調去其他政策局，消息傳出後兩名當事人都未公開回應。
頻「倒帶」 文法出錯
咁啱謝太尋日出席自資高等教育聯盟二十周年慶祝活動並擔任主講嘉賓，以為點都會講兩句闢謠，但由於佢一早話自己唔舒服打底，致詞後就封口離開現場。
講番個活動，成個論壇以英語發言，向來口才唔錯嘅謝太喺台上講嘢頻頻「倒帶」，連佢自己講講吓都發覺唔對路，主動話自己今日唔舒服，所以講英文時文法出錯。雖則謝太稱病，但仍然講足三十五分鐘，較其餘兩個講者發言長一大截，仲趁機提醒各院校未來面對人口下降時，最緊要係識得變通。就咁睇，帶病上陣嘅謝太對主辦單位認真係畀足面。