政情：廢鑊唔知醜 （舌累）地嗌擴權
人稱「廢官」嘅食物及衞生局前局長周一嶽（周一鑊），去年獲「翻閹」出任平等機會委員會（平機會）主席以來，引起無數爭議同火頭，包括早前展開歧視條例「四合一」檢討諮詢。最新數據更顯示周一鑊處事不力，接受投訴個案同六個月完成處理投訴個案達標率「不升反跌」，間接證明外界對佢有幾唔信任。最弊係周一嶽唔知衰，不但無趁機查找不足，仲要死心不息想擴權，要求政府增加撥款同搵一個平機會永久辦事處，認真厚面皮。
邊呻窮邊做大花筒
周一鑊領導嘅平機會，於一三至一四年度花錢最多嘅地方係宣傳、培訓及公眾教育服務，以及查詢、投訴及調停服務，分別佔總支出大約三成。之不過花咗咁多人力物力做宣傳同教育，該會喺一三至一四年度接到嘅投訴個案「不升反跌」，由上年度嘅九百二十九宗，下跌至八百二十七宗，換言之前後少咗一百宗投訴。
唔單止咁，平機會於兩項工作達標率，齊齊跌破八成，例如六個月內完成處理投訴個案嘅達標率，由原來八成二下滑至只有七成八；至於三個月內審批法律協助申請並回覆申請者嘅達標率，更由八成八下跌至七成九。
連串指標不升反跌，周一鑊實在係責無旁貸，咪以為佢會因而暫時避下風頭，最新舉動反而係邊呻窮，邊做大花筒。佢尋日出席活動時自爆，平機會單喺一三至一四年度，埋單蝕咗三百多萬元，之後又趁機爆料話最大開支來自辦事處租金，最近仲升到每平方呎四十四點五元，希望政府增加撥款，同埋搵一個永久辦事處，仲指明最好喺香港區或九龍區，等公眾易啲搵咁話，認真大想頭。
被斥唔配獲博士銜
不過更令人感到莫名其妙嘅係，公開大學尋日宣布向四人頒授榮譽博士學位，其中一人竟然係周一鑊。身為性傾向條例學校關注組召集人黃偉明表明唔認同公大嘅做法，又話推動同志運動唔係社會公益，亦非公義。不過黃暫時無打算向周一鑊踩場，而係留番喺本月廿三日親自同周一鑊公開激辯歧視條例喎。