政情：中環出更：辭職公投？ 阿基模棱兩可
學聯力推泛民議員辭職公投，泛民主要黨派紛紛放風對此有保留時，唯獨少咗俗稱「超級區議會」嘅區議會第二界別議員馮檢基（阿基）回應，原來佢早前去咗英國睇囝囝嘅藝術裝置展覽，上周先返港。對於五區總辭定超級區議員辭職嘅問題，阿基嘅回應有啲模棱兩可，一時就話佢所屬嘅民協冇咩發言權，一時又話五區總辭喺技術上有較多問題，兜兜轉轉都係冇明確表態。
阿基其後帶出更多拗來拗去都未解決嘅問題，如發動辭職公投最難就係要搵到合適議題，舉例指倘以撤回人大常委會政改決定作議題，早排「廣場公投」已證明咗係搞唔成；又如問及市民接唔接受政府提出嘅政改方案，泛民之前簽咗否決方案聯署聲明，唔通市民贊成「袋住先」，泛民就要打倒昨日嘅我等。
自信同街坊關係堅定
不過講到佔領行動對民協有無影響，阿基語氣就轉趨堅定，直指民協同街坊嘅關唔係風吹雨打可影響到。究竟阿基講嘅係真係假，明年區議會選舉結果將會畀到答案大家嘞。
卓妮