政情：中環出更：趙式慶以武論政 要有勇有謀
武俠小說不時有文武雙全嘅角色出現，有任教中國武術嘅中華國術總會創辦人趙式慶，近日出席「武俠書畫展」及中國古典刀劍返真展預覽時，一方面希望香港教育重新擁抱「武」嘅文化，即透過習武磨練個人意志；另一方面又以武術比喻佔領行動，認為示威者於佔領事件中缺乏策略，於重要一刻冇抓緊時機，而形勢已失嘅時候，對於一個武者來說亦係輸咗。
趙式慶對於警方同學生處理今次佔領行動手法，都有一番特別見解。佢首先指出，警方認為衝擊政府地方唔啱，決定用武力，就應該處理好事件為止，去到一半停咗係大忌。
至於警方當時使用武力有冇過火，趙式慶自言唔需要佢講，並強調參考其他地方處理手法，香港警方已算很克制，之不過同媒體交接，甚至使用催淚彈方面就缺乏經驗。
至於學界方面，趙式慶話，當全世界媒體焦點都放喺香港嘅時候，示威者冇將正確嘅訊息，以及香港人最想聽到嘅嘢講出來，亦冇好好利用社交網絡，只一味堅持強硬立場，要中央妥協，空想民主概念，因此係錯失時機。
欣賞李志清畫功
講番個展覽，今次展出多幅李志清嘅經典武俠書畫作品及鑄劍專家胡小軍嘅返真刀劍。而其中一幅展品係由趙式慶講述關於三國時代曹丕嘅故事，李志清聽後再繪畫出來。展覽當日李志清更即席為在場人士揮筆簽名兼速畫，趙式慶則笑言繪畫方面冇乜天分，但非常欣賞對方。
卓妮