今日香港風風雨雨，紛紛擾擾，街頭有街頭混亂，議會有議會惡鬥，到處烏煙瘴氣，永無寧日。
嗱，立法會工務小組下周本來要處理二十個項目，港府尋日突然抽起其中十三個項目，包括興建學校及體育館等民生工程，餘下七個項目就有中部水域人工島策略性研究等。點解要咁做？答案好簡單，防止反對派議員拉布囉。
即係咁，喺佔領鬧劇之下，反對派議員揚言發起全面不合作運動，港府推出任何措施都阻力重重；尤其係早前反對派突襲得手，奪得工務小組委員會及人事編制小組委員會控制權，港府更加寸步難行。所以咯喎，當局今次抽起部分項目，無非想釜底抽薪，令政客冇藉口拉布，都係迫不得已嘅咋。
不過咁，反對派對港府嘅做法就好唔滿意喇。工務小組主席梁家傑話喎，當局抽起部分民生項目，令佢無從調動，認為港府先發制人，「霸道、獨裁、與民為敵」；而教育界議員葉建源就指當局抽起五個學校興建項目，令呢啲項目變得遙遙無期，對教育界打擊好大，認為當局冇理由因為政治原因而騎劫民生議題喎。
咁就好笑喇，以政治騎劫民生，不嬲都係反對派嘅做法，依家居然反過來指摘港府，真係令人嘆為觀止。係呢，咁算唔算賊喊捉賊？正所謂，己所不欲，勿施於人，既然政客知道以政治騎劫民生係「霸道」、係「與民為敵」，咁就唔好郁吓就拉布，郁吓就流會喇。
除咗拉布及流會，反對派仲揚言自行更改撥款項目嘅優先次序，鍾意嘅就提前，唔鍾意嘅就押後添。正如古人所講，沒有規矩，不成方圓，由港府決定撥款項目嘅優先次序，既符合行政主導原則，亦符合立會議事規則，家陣反對派自把自為，話改就改，完全當議事規則冇到，咁仲成世界嘅？既然係咁，不如由立法會負責埋施政吖，笨！
係人都知，行政立法惡鬥不已，經濟民生淪為犧牲品，最終受害嘅都係市民咋。呢嗱，受到拉布影響，上個立法年度積壓咗大量議題，依家仲未處理，包括低收入在職家庭津貼及公務員薪酬調整等等，公務員薪酬就話可以追加啫，低收入在職家庭津貼不設追溯期，愈遲通過，基層家庭損失愈大，你話政客係咪靠害吖？
唔怪得立法會被人稱為垃圾會喇，成日嘈喧巴閉，不務正業，唔係垃圾又係乜。尋日之嘛，人事編制小組又爆發罵戰，反對派及建制派互插，結果白白浪費兩粒鐘。所以話，政府無能，政客無良，香港想唔死都幾難！