渡海濠情：開玩笑勁無聊

整蠱男友

玲玲話：「男女朋友之間，久不久開吓玩笑，本來係好正常嘅事，但你要清楚另一半嘅底線喺邊至好開玩笑，特別係啲特大玩笑，例如要佢喺第三者面前出醜之類，真係要諗清楚，我就曾經有一次搵個姊妹整蠱我男朋友，我哋約咗去食飯，喺約會地點我專登遲到幾分鐘，男友喺等我期間，就叫姊妹出嚟扮係佢嘅舊情人同佢拉拉扯扯，我男朋友正不知如何是好時，我就走出嚟話佢一腳踏兩船，令佢百辭莫辯，我故意打咗佢一巴話要分手，跟住轉身離開，正常故事發展一定係追住我解釋，點知佢冇追過嚟，反而踎咗喺街喊起上嚟，仲畀人圍住嚟指指點點，我姊妹打電話畀我問我點算？我話千萬咪踢爆，否則實分手都似，於是由佢喊咗成個鐘，之後佢再走嚟求我原諒，我當然裝作原諒佢啦！」

樂極生悲

真係玩得好大呀！玲玲話：「未算！前任男友嗰鋪仲勁，話說有日成班人去度假屋玩，我男朋友飲醉咗，於是就扶佢入房瞓覺，見佢不省人事，於是又同班朋友諗計整蠱佢，到第二朝臨天光，搵個姊妹瞓喺佢身邊，之後大夥兒屈佢借醉行兇，我男朋友同樣啞口食黃連，而劇情就係我同個姊妹同時話要生要死，睇吓男友點樣拆掂佢，前男朋友真係畀我哋玩到謝，最後有朋友忍唔住笑出嚟，男朋友至知被玩，呢個時候到佢反過嚟發爛渣，由於整蠱佢係大夥兒嘅決定，所以個個都同佢撐，男友有冤無路訴，於是更嬲，最後一走了之，之後更話要同我分手，起初都有啲唔捨得，但咁唔玩得，以後一齊都冇意思！所以奉勸各位姊妹喺開玩笑前真係要考慮清楚對方嘅底線，否則樂極生悲就唔好啦！」

玲玲Profile　　

年齡：20歲

三圍：34-23-34

撰文：小德

攝影：阿俊