政情：葉劉 大輝 急撤議案有苦衷？

葉劉指準備唔切

葉太原本前晚向立法會主席曾鈺成提出，想喺尋日嘅大會上動議一項休會待續議案，就警方協助執行高等法院三宗涉及堵塞旺角部分街道嘅禁制令進行辯論，曾鈺成亦已經批准葉太提出有關議案。不過尋日朝早九點幾，葉太突然要求撤回有關議案。雖然撤回議案令大會慳番幾個鐘開會，但一眾漏夜幫議員寫發言稿嘅助理就怨聲載道，勁呻葉太簡直就係想玩殘佢哋。

有知情人士透露，葉太之所以十幾個小時內急轉彎，係因為收到多方面嘅「關切」，大家都唔想立法會因為呢項議案而辣佔領人士，為清場添煩添亂。據知自葉太前晚通知秘書處同政府，表示會提出休會待續後，政府中人即時大為緊張，某高官仲致電唔少建制派，問佢哋知唔知葉太搞邊科，之後仲索性打埋畀葉太問佢想點。不過葉太就話，撤回議案係因為做唔切資料搜集，同有內幕消息知道警方會即將進行清場無關，又話中聯辦冇就事件搵過佢傾偈。

林稱本周將離港

林大輝原本都提出一項題為「關注香港和內地的融合和矛盾」嘅議員議案，不過上星期五又臨時決定抽起。林大輝解釋話，抽起原因係今個星期佢唔喺香港，所以唔可以動議議案。查實喺佔領清場前夕，中央及政府已經夠晒忙亂，大輝呢個時候仲提啲咁敏感議題，仲唔係添煩添亂？