中環出更：莊氏雙姝悉心經營珠寶店
佔領行動令珠寶金行等零售業飽受打擊，業界士氣低落，不過另類銷售渠道似乎未受影響。百仁基金副主席楊華勇太太莊菲娜（Fiona）家族經營的樓上珠寶店，早前斥資重新裝修後擴大營業，Fiona特登招呼好友上去參觀，包括恒生孫新抱何倍倩（Anina）及香港青聯會董潘偉業太太鄺晶晶（Akiko）等靚太都去趁熱鬧，Akiko仲趁機買隻蝴蝶戒指獎勵自己，貪靚唔使搵理由。
當日係周末下午，Akiko暫時拋低丈夫及囡囡，隻身去捧場。佢一入場就急不及待周圍睇，興致勃勃試戴，期間Fiona胞妹莊莎娜（Sarah）在旁提供意見。
舖內陳列皆出自莎娜手
事關Sarah係珠寶設計師，店內陳列盡係佢嘅作品。Akiko笑笑口話，自從囡囡出世後已好少戴戒指，因為湊女唔方便，但係當日有隻蝴蝶戒指佢一戴上手就好鍾意，所以把心一橫，買咗先算。
Sarah唔止係珠寶設計師，亦係「九十後」靚女作家，最近啱啱出版第一部懸疑長篇小說《藍光人》。Sarah自細就鍾意睇超現實嘅科幻小說，尤其沉迷於衞斯理小說。科幻世界充滿驚險與死亡，同珠寶設計看似風馬牛不相及，不過小妮子話，兩者相同之處就係無限嘅想像力。佢亦將科幻融入珠寶設計之中，並即席示範戴上一對狀似天使翅膀圖案嘅鑽石耳環。
卓妮