政情：今日你上鏡：路過佔鐘區 黃德森避忌

現為運動員就業及教育計劃經理嘅前香港風帆選手代表黃德森（Sam），尋日撇低太太、奧運滑浪風帆金牌得主「風之后」李麗珊，獨自現身金鐘佔領區天橋，仲遠觀佔領區好一段時間。行經地點咁敏感，唔通Sam都想就佔領行動表態？不過，Sam對政治話題顯得頗為避忌，澄清只係路過去政府總部開會，但佢個人希望佔領行動會有好結果，又形容港人目前心情複雜，唔知佢心情又點呢？Sam作為體育界一分子，被問到特首日前嘅體育界及宗教界「完全冇經濟貢獻」論，Sam就即時封口話冇意見，然後急急去開會喇！