政情：李秀恒冇政綱照當「廠」長
香港傳統四大商會之一嘅香港中華廠商聯合會（廠商會），尋晚舉行新一屆會長選舉，由第一副會長陳淑玲與第二副會長李秀恒對撼，呢場選舉賽前一直被形容為「五五波」，兩人鬥得難分難解。結果尋晚終於揭盅，自稱冇政綱嘅李秀恒仍以五十七票對四十一票擊敗陳淑玲，明年一月起正式就任，任期三年，令廠商會權力分布重新洗牌，未知該會未來路向會點走。
由於陳淑玲獲多名元老級前輩推薦，賽前一度被睇高一線，今次竟然輸十六票，似乎背後另有原因。有廠商會人士話，多位廠商會高層原本打算力捧另一位副會長顏吳餘英參選，後來見顏太票源過少，先陣前易帥換上陳淑玲。由於陳淑玲早前以私人理由表明無意參選，但之後忽然又選，據聞有會董都有微言，寧願支持李秀恒，所以先至出現尋晚嘅結果。
陳淑玲：全力支持對方
候任會長李秀恒就按照慣例，尋晚宴請一眾會董。佢仲講笑話，今次選舉周圍拉票，食咗超過一百五十餐飯。至於自己點解冇政綱，係因為廠商會已經做得太好，所以冇咩地方需要改革喎。落敗嘅陳淑玲亦表現大方，話今後會全力支持李秀恒做會長。至於一早表態撐堂妹陳淑玲嘅陳永棋就話，希望大家選舉過後團結一致。