政情：梁繼昌妄想狙擊兩局長
自從泛民主派議員宣布發動全面不合作運動，立法會就從此多事，其中會計界議員梁繼昌（Kenneth）早前順利輪任財務委員會轄下人事編制小組委員會主席，據知佢今次「水鬼升城隍」，不但有意喺委員會大展拳腳搵啲嘢搞吓，更點名要狙擊發展局局長陳茂波（Paul）同政制及內地事務局局長譚志源（Raymond）呢兩口「眼中釘」。不過，Kenneth同兩位局長嘅新仇舊恨係咪可以清算得晒，似乎都係得個講字囉！
深仇早種 借勢清算
據知Kenneth之所以同阿Paul有咁深牙齒印，要由前年立法會選舉開始講起，當年同佢打對台競逐會計界議席嘅林智遠（Nelson）就係由Paul親自「抬轎」，Kenneth要經歷一場硬仗先以千票之差擊敗對手，因此Kenneth同Nelson以至Paul可謂深仇早種。加上阿Paul加入政府之後接連爆出劏房風波、囤地疑雲等負面新聞，難怪Kenneth想一鋪過清算阿Paul。至於Raymond，自然因為政改一役而全面封殺佢喇。
人事小組非真「戰場」
不過，Kenneth狙擊二人嘅如意算盤恐怕未必打得響，首先人事編制小組喺今個財政年度本來就冇咩具爭議性嘅職位開位申請，真正「戰場」始終留番喺工務小組委員會。而建制派早就放風話，根本唔介意拱手相讓人事編制小組主席畀泛民議員揸fit，所以都唔係好着緊係咪補派人加入委員會。所以Kenneth想留難阿Paul同Raymond，恐怕只係一廂情願，講出嚟都可以令自己開心吓嘅。
再者，被問到其「狙擊大計」，Kenneth竟然話打算金睛火眼（目及）實二人嘅開位申請，連對家有冇呢啲開位申請都唔知，擺明空槍上陣，斷估當秘笈啦！