政情：中環出更：工務會議 小學雞拗餐懵
立法會工務小組委員會尋日召開特別會議討論十二位建制派議員嘅逾期加入申請，但兩邊陣營好似小學雞咁爭拗咗兩小時，連十二個申請係合併處理定分開處理都未決定到，結果要另外擇日再開多次特別會議討論。
泛民議員單仲偕尋日批評建制派將未有如期加入小組嘅責任卸畀助理，更加叫建制派考慮公開道歉，話「你哋痛改前非、樹立榜樣，應該會有幫助。」 建制派譚耀宗就不滿泛民一朝有權就弄權：「如果再緊要啲可能要我哋跪晒喺度，喺度喊晒口，要求畀個機會痛改前非」，質疑泛民係咪要做到咁盡，又話：「第日你做特首我哋慘囉，全部殺頭都有份囉！」而蔣麗芸都話：「做大事嘅人，丞相肚裏可撐船」，叫泛民唔好斤斤計較。
樹根激到袋巾傑紮紮跳
不過，佢哋都唔及鍾樹根一句激到主席梁家傑（袋巾傑）紮紮跳。話說樹根堅持主席對處理議員申請加入小組係有酌情權，又話泛民「如果咁遵守法例，就唔應該有佔中啦！」仲質問袋巾傑「係咪偽君子你自己決定！」激到袋巾傑一度宣布暫停會議，叫樹根睇清楚會議程序。
卓妮