中環出更：政府廿萬月薪 聘資訊科技總監
在二○一二年接替葛輝出任政府資訊科技總監嘅賴錫璋三年任期即將屆滿，而佢當年已經係以六十四歲之齡上陣，所以唔再續約都係意料之內。政府近日就在求職網站公開招聘政府資訊科技總監一職，同賴錫璋上任時一樣係為首長級第六級，但月薪就高達近二十一萬元，認真吸引。
現任賴錫璋快將完約
賴錫璋嘅任期將在明年一月屆滿，如果扣埋假期，話唔定賴錫璋已開始離職前休假。而政府就在上周四刊登咗招聘廣告聘請政府資訊科技總監，月薪為二十萬一千九百五十元至二十萬七千九百五十元。卓妮睇番資料，原來賴錫璋三年前受聘時嘅薪金大約為十八萬元，今次約多咗三萬元，唔知吸唔吸引到資訊科技界猛人加入政府呢？
另外，卓妮聽聞基於政府打算成立創新及科技局（創科局），而政府資訊科技總監辦公室將會撥入創科局，所以業界都質疑點解唔等創科局局長親自挑選資訊科技總監人選，而係由商務及經濟發展局局長蘇錦樑（Greg蘇）揀蟀。不過，依家成立創科局嘅決議案已在立法會通過，招聘程序都唔係一時三刻可完成，到時仲係唔係由Greg蘇揀人都係未知之數。
卓妮