渡海濠情：龍女不懂經營愛情
每段愛情能否天長地久，好視乎男女雙方付出，如果有一方不加重視，咁就真係想唔散都幾難，嚟自富城會嘅欣欣就話近年緣分麻麻，我哋搵嚟玄學師傅一睇，發現佢正係十二生肖中最唔懂得維繫愛情嘅朋友之一。
第一位：龍女 好勝心強
師傅話屬龍嘅囡囡性格比較進取剛強，喜歡堅持己見，無論事業和家庭都喜歡獨攬大權，要所有人都聽佢嘅主意而行，做朋友同下屬當然冇問題，但做情人同老公就會缺少一份柔情，加上好勝嘅性格，會長年累月令對方感受好大嘅壓力，忍受唔住就會分手收場。欣欣話：「我表姊就係屬龍，佢真係拍親拖都散，冇一個男人頂得佢順，所以家陣26歲都仲未嫁得出，但佢天生工作狂，可以喺公司由朝做到晚，所以年年都升職，但畀我有得揀，我情願搵個老公嫁咗佢啦！」
第二位：狗女 專心工作
屬狗嘅囡囡對愛情嘅忠誠度係十二生肖中最高嘅，但如果佢哋有工作嘅話，佢哋嘅忠誠度就會分咗大半畀公司，如果佢哋嘅老公愈冇要求，佢哋就會愈投入工作，老公會備受冷落，如果另一半抗誘惑能力低，好容易畀人搶咗個老公都唔知道。欣欣話：「我就係屬狗嘅，真係咁樣！我一有嘢做就會忘晒形，有時唔係返工做嘢都一樣出事，我上任男友就因為我忙住替個姊妹搞婚禮期間，畀佢嘅同事撬走咗，當我發現唔對路時，佢哋已經喺埋成四個月咁耐，你話我係咪失敗呢？」
第三位：羊女 懶到無譜
屬羊嘅囡囡與屬龍和屬狗嘅性格剛剛相反，佢哋做事一點衝勁都冇，反而喜歡成日黐住另一半，而且對於一啲雞毛蒜皮嘅事，都一定要依賴另一半去做，畀人十分懶散嘅感覺，但最攞命就係感情穩定後，佢哋懶到連化妝打扮同埋清潔自己都唔做，邋遢到你無法接受，可以話保鮮期極短嘅囡囡，男朋友仲有得揀，一定揀分手。欣欣話：「我有個同事就係屬羊，佢外表光鮮時，一定係空窗期，一見佢素顏示人就知佢拍緊拖，所以男朋友十個有九個都頂佢唔順，焗住要分手收場。」
每周大吉生肖
異性運：馬、猴、雞
桃花運：豬、牛
和合運：龍、羊、蛇
欣欣Profile
年齡：20歲
三圍：33-23-34
撰文：小德
攝影：阿昌
玄學提供：寶源師傅