中環出更：楊華勇蟹宴迎嘩鬼
每逢秋涼大閘蟹當造季節，中華廠商聯合會（廠商會）會董楊華勇（Johnny）都會在清水灣大宅擺下豪門宴，請廠商會青委一班手足拆蟹狂歡。前晚楊家大宅迎來四十幾名嘩鬼，事關今年蟹宴撞正萬聖節，眾人一於扮嘢應吓節。Johnny及太太莊菲娜（Fiona）帶兩名子女玩埋一份，一家四口變身蝙蝠俠家庭，溫馨到極。
當晚出席的包括青委主席張永鴻、副主席王詩雅等人，扮蜘蛛俠的常務會董黃家和兒子黃浩鈞（Howard）就同太太Iris及囡囡Olive一齊出席。不過，呢位蜘蛛俠爸爸是夜任務唔係拯救世界，而係服侍兩歲幾的寶貝女，事關BB女見到楊家庭院的韆鞦就坐唔定，經常離開餐枱跑去玩，又指定要爸爸湊佢，搞到Howard想坐定定食嘢都唔得。
好多人扮哈利波特
當晚最受歡迎的造型非哈利波特莫屬，因為有多人不約而同扮成哈利，會董莊家彬（Albert）都穿上斗篷及圓形眼鏡，加上魔法棒，造型維妙維肖。最搞笑係其中一名扮小哈利的小朋友，成晚黐住Albert多過跟自己父母，搞到Albert都有啲受寵若驚。
當晚菜式除咗肥美大閘蟹之外，廚藝了得的Fiona就親自下廚炮製拿手小菜，包括蚵仔煎、炸五香卷及魚丸蘿蔔湯等福建菜，仲有客家名菜梅菜扣肉。準備四十多人的宴席一啲都唔容易。Fiona由朝忙到晚，淨係街市都去咗兩趟，見佢着起圍裙落手落腳準備菜式，名副其實係「入得廚房、出得廳堂」的靚太。
卓妮