佔領行動死唔斷氣，外國傳媒將香港稱為「政治之都」，雖然係不懷好意，甚至有喺傷口上撒鹽嘅味道，其實未必錯得晒o架。今日嘅香港陷於政治泥沼不能自拔，而營商環境就一日差過一日，可能唔使好耐，輝煌一時嘅經濟光環就會一去不返，到時只剩低政治鬥爭可以名震中外，想唔做政治之都都唔得喇。
嗱，香港又輸畀主要競爭對手新加坡嘞。世界銀行發表《二○一五年營商環境報告》，新加坡連續第九年位列全球第一，新西蘭排第二，而香港只能屈居第三位。正所謂，逆水行舟，不進則退。香港雖然整體排名唔算太差，但喺十項營商環境指標中，七項較新加坡遜色，當中註冊財產方面嘅排名更加大幅落後新加坡七十二位，輸足九條街，簡直醜死怪。
最令人擔心嘅係，報告尚未反映佔領行動對營商環境嘅影響，即係話隨住佔中後遺症逐步浮現同深化，香港嘅未來排名隨時跌到趴街都似。唔係靠嚇o架，佔領行動沒完沒了，窒礙營商，打擊消費，搞到旅遊、酒店、零售、餐飲、運輸一條龍受害，你話營商環境冇受影響都冇人信喇。呢，有國際評級機構一早發出警告，如果本港政治情況繼續惡化，影響營商環境，不排除下調香港嘅主權信貸評級，呢個咪係政治危害經濟嘅典型例子囉。
仲有吖，法治係營商環境嘅基石，佔領行動和尚擔遮，無法無天，甚至連法庭嘅禁制令都當係廢紙，咁搞法，莫講話營商環境如王小二過年，一年不如一年，香港嘅法治招牌都保唔住，到時真係搵鬼投資咯！
話時話，政治狂熱火上加油，經濟困局雪上加霜，備受侵蝕嘅又點止營商環境吖。以金融業為例，滬港通本來日前開通，結果中央驚香江亂局影響上海，臨門一腳煞停，家陣連幾時落實都遙遙無期，你話係咪見財化水吖？金管局前總裁任志剛撰文警告，香港經濟繁榮建基於能有效發揮內地與外地嘅中介角色，尤其喺金融領域最為明顯，香港靠唔住，一味添煩添亂，內地一定會另起爐灶。梗係啦，中央下決心發展上海同深圳金融市場，睇怕香港國際金融中心嘅招牌都掛唔住幾耐咯。
事實好清楚，佔中唔係挽救香港，而係摧毀香港。正如官媒話齋，香港係自己唔爭氣，與人無尤。唔講唔知，全球經濟正在放緩，生產力促進局最新營商指數創兩年新低，反映經濟前景轉為悲觀，佔中持續落去，肯定令情況雪上加霜，盞自己玩死自己嘅咋。
一句講晒啦，營商環境受摧殘，經濟光環不復返。若然香港最後真係畀佔中害死，到時就唔係「政治之都」，而係「自毀之都」嘞！