政情：郭偉強「P」牌 得個擺字？
立法會新會期開始唔夠兩個星期就遇上首次流會，當中勞工界郭偉強就因為差一步未踏入會議廳而做唔成拯救流會嘅「白武士」。佢透露早兩日已經成功考到輕型貨車嘅「P」牌暫准駕駛執照，遲啲買埋車就可以揸車返工，唔使再日日搭巴士。不過，佔領行動搞到港島區交通非常擠塞，如果家住香港仔嘅郭偉強要揸車返工，肯定遇上塞車，真係搭車好過。
郭偉強話，佢原本計劃在今年四月考輕型貨車車牌，當時已經學咗一半，不幸遇上立法會「拉布」戰，日日要留喺立法會出唔到去學車，於是就申請將考試押後到十月。
一次就合格
佢喺上月重新搵師傅學車，最後只係學咗二十幾個鐘就膽粗粗去考試，點知幸運地考一次就合格攞到輕型貨車車牌，可以同時駕駛私家車。佢話平時經常要周圍去出席活動，加上就嚟結婚，婚後同老婆出外遊玩，揸車點都方便得多喎。