政情：輸打贏要 仁薇言歪
一向被泛民主派視為橋頭堡嘅大律師公會近月接連就各項政治議題表態，公會前日就佔領行動發表聲明，對近日有政黨背景人士呼籲群眾集體違抗法庭頒下禁制令嘅行為表示極度憂慮，擔心長遠會損害香港法治。不過，有泛民中人竟然批評大律師公會聲明毫無邏輯、屬低水平之作，甚至話唔明佢講緊乜；更有大狀話份聲明嚟得太遲喎。班泛民啱聽嘅說話就讚，唔啱聽就彈到一文不值，真係輸打贏要兼夾低水平。
大律師公會早前在政改諮詢結束前夕發表意見書，話《基本法》第四十五條規定特首候選人只可由提名委員會提名產生，明確否定公民提名。泛民一見到公會出份咁嘅聲明，即時批評公會無視市民對真普選嘅訴求，又話雖然《基本法》無列明公民提名合法，但唔代表係違法喎。
事隔五個月後，當各區佔領行動蔓延到多個旺區，法庭上星期就旺角同金鐘兩地區的佔領行為頒布禁制令，要求佔領人士盡快停止堵塞道路，但竟然有泛民法律界人士呼籲群眾集體違抗法庭命令。大律師公會於是再發表聲明話，雖然有唔少人認為人大常委會決定對公民及政治權利施加不合理限制，但唔代表市民有權走向另一極端，又話如果有人違抗法庭命令，會令社會逐漸陷入無法律狀態。
無視法律 話人低水平
貴為執業律師嘅民主黨議員何俊仁（AV仁）竟然話，早喺佔領行動爆發前夕，泛民已經表明公民抗命係違法行為，又話佔領人士雖然違反禁制令，但唔代表佢哋唔尊重法治，唔明公會份聲明講緊乜。佢又批評公會平時啲聲明甚有水準，但今次呢份堪稱低水平之作，認為公會嘅解釋無乜邏輯喎。咁都噏得出，真係唔知邊個低水平兼無邏輯。
身為資深大律師嘅公民黨主席余若薇尋日亦死撐話，雖然大律師公會份聲明有一定道理，但認為公會應該喺人大就政改作出決定、警察同反佔中者握手時出聲明譴責呢啲行為，依家因應禁制令而出份聲明係「嚟得太遲」喎。泛民平時開口埋口都話要尊重法治，但依家就為咗爭取普選而視法律於無物，難怪公會聲明形容如今法治「危如累卵，破在旦夕」喇！