正所謂知人口面不知心。咪睇佔領行動班頭面人物言必稱民主自由，好似好正氣凜然咁，實際好多嘢唔見得光o架。呢，最近某佔中搞手捲入非禮醜聞，涉嫌對九十後義工上下其手，飽嘗獸慾，就係現成例子嘞。當然啦，披住羊皮嘅狼又點止淫賤政棍吖，近年校園風化案頻傳，搞到家長有得震冇得瞓，最離譜嘅係，當局一直以私隱為由堅拒公開教師註冊資料，家長隨時送羊入狼口仲懵然不知。
呢，本報早前比較教師、醫生、社工等十多個專業嘅註冊制度，發現全部都喺網上公開專業人員嘅註冊資料，方便公眾查閱，唯獨教師唔知係咪高人一等，居然另搞一套，唔單止對教師係咪因性罪行被「釘牌」秘而不宣，甚至連註冊教師名單同數目等一般資料都唔披露。教師註冊黑箱作業咯喎，香港容乜易變成孌童犯嘅樂園o架，教育當局助狼為虐，問你服未！
嗱，申訴專員公署肯定唔服，公署尋日宣布主動調查，呼籲公眾積極提意見，又話近月從報章報道得知，唔少家長組織以至教師團體建議教育局公開註冊教師名單，所以展開調查咁話。雖然冇開名，但係人都知呢單嘢係本報率先揭發，我哋梗係當仁不讓！
家陣香港七國咁亂，行政、立法、司法三權皆廢，好彩有傳媒第四權仲可以發揮監察作用，唔係功夫茶賣花讚花香o架，東方報業集團為民喉舌，一直企喺揭弊揭醜最前線，最典型例子莫過於年前獨家踢爆前特首曾蔭權爵士連串醜聞，搞到貪官污吏如過街老鼠。成日話「有東方，冇窮人」，其實應該加多句「有東方，冇黑幕」就真。
好嘞，言歸正傳。教育局一直以保護私隱做擋箭牌，拒絕公布註冊教師名單，根本不值一駁。私隱冇錯係要保護，但絕對唔可以凌駕於公眾利益之上。性罪犯唔適合擔任面向兒童嘅工作，呢個已經係常識，所以好多國家同地區早就設立咗性罪犯名冊，美國及蘇格蘭等地更喺網上公布曾犯性罪行教師名單，教育官僚連照搬有關做法都懶，講到尾咪又係少做少錯，唔踢唔郁囉，所以話啫，申訴專員公署早就應該做嘢o架啦。
唔講唔知，○六年至今本港發生逾百宗教師風化案，當中近半數被定罪，校園儼然淪為色魔樂園，證明對淫師包庇縱容，即係對幼童殘暴不仁。教育官僚不妨將心比心，設身處地，如果自己仔女有機會暴露喺淫師魔爪下，睇吓你哋仲會唔會攞私隱當擋箭牌，臭屎密冚吖嗱！