佔中已滿月，遺禍深遠有目共睹，旺角幾乎日日武鬥，佔領者與拆路障者無時無刻互相指罵，彼此惡形惡相，一言不合便扭打叫囂起來，咁失控嘅場面，若然再持續下去，即使滬港通唔煞停，香港依然冇運行！
佔領運動以來，社會民怨滔天，經濟、民生深受其害，香港進入一個不會笑、不懂笑嘅時代；不懂笑，肯定有病，有病，得治，然而，此時此刻，狂熱的佔領者似乎吃了一睡不起嘅安眠藥，天真教授與無知學生依然未瞓醒，咿咿哦哦如鬼食泥，想到就亂噏，一時一樣又話會「自首」博拉，忽然又話公投擱置……如此進退失據，引喻失義，自我掌摑，唔怪得近日求診精神科者暴增喇！
香港淪喪，佔中三子顯然已是亂世之標本！佢哋無論點鞠躬道歉，依然難以彌合香港嘅撕裂創傷！
《戰國策‧秦策二》記「扁鵲投石」一則，話說名醫扁鵲去看秦武王，佢將自己嘅病狀告知扁鵲，扁鵲答應盡力治好佢嘅病；然而，秦武王身邊一大班人卻七嘴八舌，說甚麼「大王嘅病，同耳朵有關，眼睛也有關，唔易醫，只怕醫唔好反而會影響聽覺和視力……」講到秦王心大心細，冇晒主意，惟有把一眾大臣嘅話告知扁鵲。
扁鵲一聽，霎時火都嚟埋，將拿在手裏準備施治嘅砭石（有如後來的金針）往地上一砸，怒說：「大王讓明白人來做事，卻又讓不明白的人說三道四諸多阻撓；國家大事如果也這樣辦，秦國就會亡在大王你的手裏！」
這則短文實在寓意深厚。今香港之沉淪，有本事的人如扁鵲，冇人欣賞，而病入膏肓嘅天真教授與一眾無視一國者，未認清「魚和水」關係者，胡亂發表意見，毫不費力就摧毀香港百年「福地」，唉！社會撕裂三權亡，皮之不存，毛將焉附，天真教授成事不足，敗事有餘。