「為當日嶺大生傷心」
肥亨尋日話，知道件事後已經主動聯絡顧明均，勸佢接受浸大頒發學位，而且仲話現時唔應該被政治議題干預日常生活及工作。
肥亨重提嶺大舊事，似乎無乜唔開心，佢話反而覺得傷心多啲，覺得當日班嶺大學生嘅表現，似乎唔識得咩叫尊重，如果呢班學生日後投入職場，都唔知點算好。講起早前佢掛住睇電話而撞親隻眼，我哋趁機問候佢好番啲未，肥亨笑笑口話已經無事，事關佢太太用古法碌雞蛋消腫，估唔到咁使得。
講開又講，肥亨英文名叫阿Fred，查實政界好多時都撈亂其他人，因為民主黨李華明都係叫阿Fred，有人以為肥亨今年係民主黨籌款委員會主席，其實李華明先係。