政情：芸提舊事 否認曾佔船

強調只係抗議

事隔八個月，阿Ann仍深深不忿，尋日趁立法會討論啟德郵輪碼頭最新發展時借題發揮，話當時「人哋高高興興咁上船，悲悲哀哀咁落船」，又狂數食物係世界上最差，船長態度亦令人不敢領教云云。仲否認當日與其他郵輪旅客一齊「佔船」，強調係「抗議」喎！

阿Ann話，佢乘搭郵輪無數，依家先發現有好多經香港的郵輪都會出事，認為政府應研究制訂守則，加強監管途經香港的郵輪，唔好一聽到係意大利郵輪就嚇到鵪鶉咁，束手無策。阿Ann仲話，如果政府有制訂守則，他日發生同類事件就算死都甘心。佢一輪嘴講唔停，搞到委員會主席林健鋒亦要出聲，叫佢留番少少時間畀旅遊事務專員容偉雄回應。