中環出更：「歐飛」回巢 暫代黃晙
公民黨（大狀黨）總幹事黃晙被指涉嫌一宗非禮案，黃晙事後已向大狀黨及佔中秘書處申請休假，要求處理個人事務。估唔到事隔幾日，大狀黨咁快搵到人頂替黃晙空缺位置，佢就係人稱「歐飛」嘅大狀黨前總幹事歐陽志飛喇！其實歐飛正正就係黃晙嘅上一手，又幫大狀黨打過好多場選戰，由佢回巢暫代總幹事一職，完全冇難度。
啱啱好讀完書返港
歐飛擔任大狀黨總幹事多年，去年佢申請到外國獎學金，於是辭職飛去英國倫敦經濟政治學院攻讀碩士課程，由黃晙接下總幹事。事隔年幾，黃晙捲入官非，而歐飛就啱啱好讀完書返香港搵工，聽聞歐飛初初無打算即刻返大狀黨，但由於突然爆出呢單醜聞，所以歐飛就頂硬上，尋日開始暫代黃晙出任總幹事。
世事永遠係咁巧合，如果去年歐飛唔係遠赴倫敦讀書，黃晙就未必成為大狀黨總幹事，亦未必會做到佔中秘書處骨幹成員，今次歐飛肯幫手收拾殘局，都算捱義氣囉！
卓妮