中環出更：假髮大王 搵理大省招牌
每兩年換屆一次嘅理工大學總裁協會尋日舉行新一屆就職典禮，適逢協會踏入十周年，一班總裁級成員難得雲集尖沙咀一間酒店。冧莊做理事長嘅「假髮大王」精工髮品廠董事總經理趙振國（CK）話，協會多年來與理大合作培育唔少青年總裁或創業家，亦不時與理大合作科研計劃，希望畀時下年輕人多啲機會，協助後生仔搵到人生方向。
運用大學資源人才
CK以自己盤生意為例，雖然佢哋識得造假髮，但始終戴假髮嘅人都唔鍾意話畀人聽，所以喺市場推廣上有難度。由去年開始，佢就請理大品牌學院幫手做顧問、培育人才，協助發展歐美國家嘅市場。理大副校長兼總裁協會榮譽理事長阮曾媛琪亦同意，大學嘅專業知識及資源，可以支援唔同企業發展或開發新產品，增加國際競爭力。校方亦會以唔同形式支持協會，好似呢日舉辦酒會及儀式嘅酒店場地，就係理大酒店系學生實習嘅地方喇！
同場仲有協會副理事長「家電大佬」陳國民及古董收藏家黃經國，新丁理事儲存易迷你倉集團主席陳啟豪（Kevin）都有到場。講起迷你倉行業嘅新趨勢，Kevin話佢哋六成都係家居客，近年網上購物普及，好多人因為返工返學冇人收件好苦惱，所以佢就諗到同商場合作代收貨，透過手機傳送QR code畀客人，等佢哋收工之後可以自行去商場儲物櫃攞返。呢個功能仲可以畀客人存放一早買定嘅禮物，可以畀家人或情侶驚喜，非常浪漫。
卓妮