立法會畀人叫「垃圾會」，真係一啲都無錯，呢，復會短短一個星期之嘛，再次爆出流會醜聞，搞到連會都開唔成，連最基本職責都履行唔到，想唔認垃圾都唔得喇，吓話！
立法會大會尋日續會，點知一開波就撻Ｑ，居然法定人數不足，以致流會收場，簡直混帳。咪睇反對派同建制派平日勢成水火吖，講到缺席怠工偷懶蛇王咯喎，不知幾齊心，兩派分別只有二十三名及十一名議員出席，即係合共超過一半同僚唔見影，大家估佢哋去咗邊度蛇王吖嗱？最好笑嘅係，兩派議員例牌互相指摘，互扯貓尾，你批評我蓄意缺席變相拉布，我炮轟你護航失職罪魁禍首，總之又係吵吵鬧鬧，丟人現眼，醜上加醜。
正所謂，狗咬人唔係新聞，人咬狗至係新聞。講真嗰句，立法會因議員失職而流會，市民早就見怪不怪咯，成件事最醜陋嘅係，立法會復會只有一個星期，鬧劇已經火速重演，議事堂究竟沉淪到乜嘢地步，畫公仔唔使畫出腸喇。根據議程，有三項附屬立法嘅延展期限至尋日截止，家陣會議告吹，立法受阻，呢條數點計先？正如立法會主席曾鈺成話齋，開會係議員嘅最基本責任，任何理由都唔可以成為缺席嘅藉口，失職議員不負責任，有負眾望，全部都欠社會一個交代！
不過話時話，立法會流會固然令人失望，其實就算唔流會，情況都唔好得幾多嘅咋。今時今日嘅議事堂，吵鬧不休，烏煙瘴氣，邊係做實事。大家有眼睇，立法會復會以來，一直忙於政治爭拗，至今未做過一件正經事情，有開會等於冇開會。嗱，尋日大會原定討論開設創新及科技局議案，但係有激進派議員批評設立創科局浪費公帑，且會淪為政治利益輸送工具，揚言不惜以任何手段阻撓。大家話嘞，立法會淪為政治鬥獸場，唔係流會就係拉布，唔係爆粗就係睇鹹相，咁搞法，就算開得成會都無用喇，係咪？
事實擺在眼前，整個社會正陷於政治泥沼不能自拔，唔止街頭被佔領，連立法會都被佔領，香港永無寧日。反對派早已揚言發起全面不合作運動，癱瘓議會運作，癱瘓港府施政，莫講話開設創科局，其他重要政策如新界東北發展計劃及「三堆一爐」等，都會被百般阻撓，動彈不得。立法會嘅職責本來係監督港府施政，家陣居然變成阻撓港府施政，徹底癱瘓，施政空轉，以致經濟停滯，民生凋敝，最終受害嘅又係全港七百萬市民。
一句講晒，立會復會又流會，政客無良禍香江。市民如果唔想立法會繼續變垃圾會，唔想香江死亡，最好方法係清理門戶，喺下屆立法會選舉將所有垃圾議員掃地出門喇！