立法會昨早原本續會討論設立創新及科技局，但會議一開始就因尚欠一人而流會。之後有議員面向傳媒大吐苦水，話佔運令到交通時間大失預算；有議員就話呢個唔係藉口，唔揸車坐地鐵一早已返到；有議員又攻擊某些激進派議員，情願回到大樓食早餐也不入去議事堂開會……最後，立法會主席和高官在一片「遺憾」中表示「無奈」！
事實上，立法會流會都唔係乜嘢新聞喇，尊貴嘅議員視流會如食生菜，佢哋除咗努力識嗌為自己爭取加薪外，更擅長廢噏、亂擲嘢、拍枱拍櫈、拉布、自製道具……議事堂內烏煙瘴氣，所以被網民戲稱為「垃圾會」。魯迅曾慨嘆中國許多人，大抵患有「十景病」，凡看一部縣志，點都會數到十樣、八樣佳景出來吹水，好似「蕭寺清鐘」、「古池好水」之類……
而香港嘅「垃圾會」，睇怕唔止有「十景病」，垃圾議員興之所至，可以表演書道、唱功、廢噏、獅吼功、擲嘢無界限、睇水着性感美女網、撐一把黃傘……各適其適，各展所長，花款繁多豈止「十景」，令人目不暇給；至於關乎市民福祉，民生工程等正經事，就話之你，積壓要審議嘅環保、工程項目只會延誤下去，推高成本令公帑如倒落鹹水海，老朽只能在「遺憾」聲中，悲嘆垃圾會人事不修，群趨鬼道，未來香港只剩下「沉淪」兩字！「遠路必須愁日暮」，佔領運動不知何時何日休，香港氣數睇怕係咁先！
議事堂內即使唔流會亦言不及義，政客不合作，主席只能一味呼喝「議員」安靜埋位及搖頭嘆息，睇見都戥佢辛苦！議事堂內竟如古羅馬鬥獸場，老朽懷疑立法會究竟有冇存在嘅必要與價值？
「天道無親，唯德是與」，垃圾會內群趨鬼道，失時而不與人，廢噏反智盈耳，港人唯有自求多福並作最壞打算！