政情:顧明均拒領浸大榮譽博士

早前嶺南大學向商務及經濟發展局前局長馬時亨頒發榮譽博士銜,但當場遭嶺大學生「柴台」,事件更成為傳媒焦點。有「電子大王」稱號嘅商人顧明均,最近亦獲浸會大學頒授榮譽工商管理博士學位,但佢認為馬時亨受到不必要侮辱同不被尊重的恐怖情景,實在令人心寒喎。所以佢尋日向浸大發出書面聲明,拒絕接受浸大頒發有關榮譽。

同情警員向示威者「大懲小戒」

顧明均在書面聲明中指出,見到近日佔領行動示威者多番使用暴力衝擊執法嘅警隊及各種霸佔道路,既違法又野蠻,剝削市民使用道路嘅權利,並騎劫其他市民嘅民權及自由,成為威脅政府的籌碼。佢又力撐警方依法執法,仲好同情有警員在處於嚴重挑釁嘅惡劣環境下向示威者作「大懲小戒」,這種涉及違法違規行為實是「佛都有火」,人之常情喎。

顧明均話近日見到馬時亨在接受頒發榮譽博士時受到侮辱及不尊重,所以佢呢個時候不應該亦不敢接受浸大嘅殊榮,希望浸大取消向佢頒發榮譽博士學位。浸大發言人話,好有誠意向顧明均頒發榮譽博士學位,浸大校長陳新滋已親自聯絡顧明均,希望佢出席頒授典禮。

理大學生會內訌 六人突請辭

另外,理工大學學生會亦爆內訌,幹事會六位莊員昨發表聲明集體請辭,茅頭指向評議會,當中涉及錢銀瓜葛。聲明話九二八事件後幹事會曾向評議會申請撥款支持佔領人士,但評議會突然加碼幾倍,仲放入私人戶口,令人質疑利益輸送。聲明指不滿會長賴偉健過分側重外務,令幹事會間缺乏溝通,昨網上流傳會長嘅請辭信,本報聯絡過佢,但截稿前無覆。

第一手消息請下載on.cc東網iPhone/iPad/Android/Windows Phone Apps