政情：中環出更：林健鋒因流會獲「生日假」
特首梁振英日前提出要擴大特首選舉提名委員會嘅民主成分，包括將公司票變成個人票，令更多人可以有投票權。身兼行政會議成員的商界立法會議員林健鋒（Jeffrey）話，公司票變個人票並非無可能嘅事，但當中涉及非常複雜嘅議題，包括在增加選民人數時，要確保界別嘅代表性；如果只係針對某啲界別「開刀」，可能會引起不滿，所以詳細點做要慢慢研究。
笑言恨抱孫
尋日係Jeffrey六十三歲生日，原本諗住成日留喺會議廳坐定定走唔甩，但點知立法會大會因為開會法定人數不足而流會，無喇喇多咗一日假期，令佢可以同屋企人慶祝生日，簡直係雙重開心。Jeffrey嘅辦事處職員尋日就特登幫佢搞咗個生日派對慶祝，令佢喜出望外。
Jeffrey喺許願時話，生日願望係世界和平，又自爆囝囝喺夜晚預訂咗一圍酒席同佢慶祝，下午更加帶埋女性朋友同佢食午飯，搞到佢好開心，講笑話想林家可以快啲繼後香燈喎！
卓妮