政情：中環出更：東華秋祭 祈求紛亂早平息
東華三院每年均舉行秋祭典禮，為香港祈求風調雨順。主席施榮恆（Ivan）尋日與一眾董事局成員，於中午時分齊集上環文武廟外，齊齊按傳統穿上唐裝長袍玄褂入廟進行祭祀儀式，祈願香港社會可以恢復穩定，佔領行動早日得到共識和平結束。
Ivan話，佢哋呢身黑藍色長褂係東華多年傳統服飾，每個董事局成員加入時，都會搵師傅度身訂造一套，但佢哥哥施榮懷就留咗一套畀佢，所以佢就唔使再造喇。不過，佢透露長褂入面本來仲有條唐裝褲，但因為唔方便行動，佢都係着番西褲就算喇。
施榮恆教仔勁花唇舌
除咗交通，Ivan話佔領行動對佢影響不大，但佢個七歲囝囝就經常有意見喎！由於佢囝囝不時會喺電視睇到有關佔領嘅新聞及資訊，但又可能未識分析，有時講「爸爸我要支持佔中」，有時又話「爸爸我要反佔中」，佢要花好多時間解釋當前發生緊咩事。
副主席王賢誌就話，佔領行動開始後，佢習慣每去一個地方都會先諗邊條路最快。有次佢要半個鐘內由上環去鰂魚涌，決定先由西隧兜去九龍，再經過啟德及觀塘繞道往東隧返回港島，兜大圈但可以準時到達。
講番個祭祀儀式步驟包括神禮、初獻禮、恭頌祝禮等，頗為複雜，但本身信奉基督教嘅副主席陳祖恒都耐心完成，佢話唔怕儀式同佢個人宗教有衝突，事關覺得好多中國傳統習俗都好有意思，非常值得保留，好似農曆新年、中秋節呢啲傳統節日，大家一樣可以從習俗中感受到良好氣氛。
卓妮