家陣香港最熱門嘅話題，肯定非佔領莫屬。唔止旺角、金鐘、銅鑼灣等鬧市被激進派佔領，連有香港後花園之稱嘅西貢及南丫島亦被內地客佔領，仲要搞到垃圾遍地，粗口橫飛，問你怕未。
大家都知，香港佔領行動沒完沒了，內地旅客唔敢踏足鬧市旺區，惟有轉攻香港後花園。話說早排有內地傳媒推介深度遊熱點，南丫島同西貢榜上有名，結果人怕出名豬怕肥，大批內地旅客慕名湧至，當地居民未見其利先見其害，被旅客嘅擾民行為搞到頭都大埋，呢鋪認真大鑊。
有南丫島飾物店東主大吐苦水，話內地旅客不請自來，坐喺店內寫明信片，仲要嘈喧巴閉，「一坐不起」，搞到客人過門不入，無奈下惟有開聲勸阻，如果唔係，都唔知嘈到幾時至收科。
更惡頂嘅係，部分旅客財大氣粗，有錢大晒，以為做乜都得。咁仲唔止，佢哋扮晒大豪客之餘，貪小便宜嘅劣根性依然不改，呢，有居民喺泳灘女更衣室見到內地旅客猛咁扯啲廁紙，好似唔使本咁，睇唔過眼話咗兩句啦，對方即刻發爛渣，一時彈廁紙霉，一時投訴第二樣，惡形惡相。
西貢亦唔好得去邊咋。當地最著名景點莫過於橋咀島罕有岩石「菠蘿包」，岸邊明明有告示提醒旅客，挖掘岩石屬於違法，點知內地旅客視若無睹，內地小童不斷挖取岩石掟落海，隨行嘅大人就話之你。仲有呀，有內地女士着住高跟鞋踩上岩石，幾乎差錯腳跌倒，睇見都牙煙。你話嘞，畀內地旅客咁搞法，「菠蘿包」容乜易縮水變成「小籠包」o架。
冇計喇，內地旅客出晒名唔守規矩，我行我素，呢啲不過小兒科咋。無論埃及樂蜀神殿、英國大教堂，定係法國藝術館，無不被「到此一遊」嘅中國人搞到烏煙瘴氣，至於高聲喧嘩、排隊打尖、過馬路衝紅燈、隨地吐痰甚至隨地便溺咯喎，更加係家常便飯。國人劣根性隨處可見，中國人變咗不文明嘅代名詞，怪得邊個吖。
有旅遊業界人士批評，當局無論對新景點規劃，定係對旅客嘅教育宣傳，通通嚴重不足，真係講得冇錯。特別係家陣本港政治環境惡劣，如果當局繼續對內地旅客嘅劣行視而不見，令兩地民眾芥蒂加深，隨時可能爆大鑊嘅咋。
講到呢度，功夫茶諗起央視前排出咗個教育同胞海外文明旅遊嘅廣告，一隻大熊貓去澳洲玩，點知佢竟然亂拋垃圾、公園長椅當睡床，仲喺公共場所小便添，結果廣告因為爭議太大而被撤。梗係啦，明明係中國人質素低，老屈天真可愛嘅大熊貓不文明，簡直捉錯用神。嗱嗱嗱，諉過卸責都係中國人劣根性嘅一種，你話個廣告係咪諷刺吖。